Balthasar Alexis Henri Antoine von Schauenburg

Hops zue: Navigation, Suech
Dr Balthasar vo Schaueburg (1748–1831)

Balthasar Alexis Henri Antoine vo Schaueburg (* 31. Juli 1748 z Hellimer, Département Moselle; † 1. Septämber 1831 z Geuderte, Département Bas-Rhin), isch e franzöösische General us em elsässische Gschlächt vo de Schaueburg gsi.

Karriere

Vor dr Franzöösische Revoluzioon het er in dr Armee vom französische Köönig dient und isch denn 1791 zum Maréchal de camp (= underst Generalsrang) beförderet worde. Er het in dr Rhiiarmee kämpft und isch 1793 zum Divisionsgeneral ernennt worde. As Kommandöör vo dr Moselarmee het er in dr Schlacht bi Pirmasens am 14. Septämber 1793 e Niiderlaag gege d Pröisse müesse hhinee. Wääred dr Terrorherrschaft isch er e baar Mönet ins Gfängnis choo, 1795 isch er Generalinspäkter vo dr Infanterii worde.

Dr Iifall vo de Franzoose in die Alti Äidgenosseschaft

Lueg au: Dr Iifall vo de Franzoose in die Alti Äidgenosseschaft 1798

Im Januar 1798 het er under em Napoleon Bonaparte d Inwasion in die Alti Äidgenosseschaft gläitet.

Am 1. Merz het er d Stadt Soledurn bsetzt und am 5. Merz d Schlacht am Grauholz gegen e Bärner General Karl Ludwig von Erlach gwunne. Am 8. Merz isch er Ooberbefäälshaaber vo dr Helvetische Armee worde und het er im Mai 1798 dr Widerstand vo dr Innerschwiz broche. Im Summer, wo sich d Nidwaldner no äinisch erhoobe häi, isch s zwüschen em 7. und 9. Septämber zu de Schreckensdääg vo Nidwalde cho, wo drotz de Befääl vom Schaueburg franzöösischi Soldate Übergriff uf d Zivilbevölkerig gmacht häi. Witi Däil vo Nidwalde si blünderet und aabebrennt worde. D Ort Ennetmoos, Stansstad und Buochs si vollständig zerstöört worde, dr Hauptort Stans zum Däil.

Am 10. Dezämber isch dr Schaueburg vom André Masséna abglööst worde und het denn bis 1813 as Armeeinspäkter z Stroossburg dient.

Noch em Napoleon

1814 het er sich em Louis XVIII. aagschlosse und het bis zu sim Rückdritt am 24. Dezämber 1814 wider sini früenere milidäärische Würde zruggbechoo.

Si Naame isch uf em Driumfbooge z Bariis in dr 23. Spalte (SCHAWEMBOURG) ufgschriibe.

D Schaueburg-Sammlig

Vom General Schaueburg chunnt dr Naame vo dr Schaueburg-Sammlig. Es handlet sich drbii um e Sammlig vo milidäärisch wichdige Charte vom alte Staat Bärn, wo dr Schaueburg 1798 konfisziert het. Erst sini Erbe häi sä wider zrugggee. Si bestoot us 62 Charte und isch 1989 faksimiliert worde.

Litratuur

  • Engelberts, Derck C.E.: Die Geschichte der Schauenburg-Sammlung. In: Cartographica Helvetica Heft 1 (1990) S. 18–20 Volltext

Weblingg

Information icon.svg Dä Artikel basiert uff ere fräie Übersetzig vum Artikel „Balthasar_Alexis_Henri_Antoine_von_Schauenburg“ vu de dütsche Wikipedia.

E Liste vu de Autore un Versione isch do z finde.

The article is a derivative under the Creative Commons Attribution-ShareAlike License. A link to the original article can be found here and attribution parties here. By using this site, you agree to the Terms of Use. Gpedia Ⓡ is a registered trademark of the Cyberajah Pty Ltd.