Katja Kipping

Zur Navigation springen Zur Suche springen
d Katja Kipping, 2014

D Katja Kipping (* 18.Jänner 1978 z Dresden) isch e dytschi Bolitikeri (Linki). Syter anne 2005 isch si Mitglid vum Dytsche Bundesdag, syt 2012 zämme mit em Bernd Riexinger Barteivorsitzeri vu dr Bartei Die Linke.

Voreb si in dr Bundesdag yyzogen isch, isch d Kipping vu 1999 bis 2005 fir d PDS im Landdag vu Sachse ghockt, wu si ab 2003 au em Fraktionsvorstand aaghert het. Vu dr Grindig vu dr Linksbartei 2007 bis zue ihre Wahl as Vorsitzeri isch si au stellverdrättendi Barteivorsitzeri gsii. D Kipping nit zum reformorientierten un au nit zum linke Barteifligel zellt. Si stoht dr Emanzipatorische Linke, ere Stremig in dr Barteimitti, noch.

Läben un Beruef

d Kipping (2009)

D Kipping isch d Dochter vun eme Ekonom un ere Lehreri. Noch em Abitur anne 1996 am Annen-Gymnasium z Dresden het d Katja Kipping vu 1996 bis 1997 e Freiwillig Sozial Johr z Gattschina bi Sankt Petersburg (Russland) glaischtet. Si het vu 1997 bis 2003 Slawischtik mit dr Näbefächer Amerikanischtik un Effetlich Rächt an dr TU Dresden studiert un het as Magistra Artium (M. A.) abgschlosse mit ere Magischterarbet iber „Interdependenzen zwischen Politik und Literatur, exemplarisch dargestellt an Werken von Černy¨evskij, Čechov und Blok“

D Katja Kipping isch syt Merz 2011 ghyrote mit em Bolitolog Kolja Möller un het mit ihm e Dochter, wu im Novämber 2011 uf d Wält chuu isch.[1] Si läbt z Berlin un z Dresden.[2]

Bartei

d Kipping am Oobe vu dr Bundesdagswahl 2013

D Kipping het si syt si studiert het im sognännte Proteschtbiro an dr TU Dresden engaschiert un isch anne 1998 Mitglid vu dr PDS wore. Ab Juli 2003 isch si stellverdrättendi Bundesvorsitzeri vu dr PDS mit dr Arbetsschwärpinkt Agenda Sozial un Kontakt zue solziale Bewegige gsii. Si het im Barteibildigsprozäss as aini vu dr Befirworterne vun ere verainigte geamtdytsche Linke gulte. Am 16. Juni 2007 isch si zur stellverdrättende Bundesvorsitzeri vu dr Bartei Die Linke gwehlt wore. Fimf Johr speter hän d Delegierten uf em 3. Bundesbarteidag am 2. Juni 2012 d Katja Kipping mit ere Zuestimmig vu 67 % zur Bundesvorsitzeri gwehlt. Syterhär verdritt si d Bartei zämme mit em Bernd Riexinger.[3] Uf em Berliner Barteidag im Mai 2014 isch si mit 77 % vu dr Stimmen als Barteivorsitzeri bstetigt wore.

Abgordneti

D Katja Kipping het vu 1999 bis 2003 em Stadtrot vu Dresden aaghert.

Vu 1999 bis 2005 isch si Mitglid vum Sächsische Landdag gsii. Do isch si Sprächeri vu dr PDS-Fraktion fir Verchehrs- un Energiebolitik un ab 2003 au Mitglid vum Fraktionsvorstand gsii.

Syter anne 2005 isch d Kipping Mitglid vum Dytsche Bundesdag. Si isch as Spitzekandidati vu dr Landeslischt Sachsen in dr Bundesdag yyzoge. Im Bundesdag isch di sozialbolitisch Sprächeri vu dr Linksfraktion. Ihre Wahlchrais isch Dresden I.

Vum 25. Novämber 2009 bis 26. Septämber 2012 isch si Vorsitzeri vum Uusschuss fir Arbet un Solzials vum Dytsche Bundesdag gsii.[4]

Schrifte

  • mit dr Christine Buchholz (Hrsg.): G8 – Gipfel der Ungerechtigkeit. VSA, Hamburg 2006, ISBN 3-89965-200-2.
  • Ausverkauf der Politik – Für einen demokratischen Aufbruch. Econ, Berlin 2009, ISBN 978-3-430-20079-0.

Weblink

 Commons: Katja Kipping – Sammlig vo Multimediadateie

Fueßnote

  1. Katja Kipping ist Mutter, Tagesspiegel, 20. Novämber 2011
  2. Sächsische Zeitung vum 28. Dezämber 2012
  3. Wahl des Parteivorstandes. Die Linke, 2. Juni 2012, abgruefen am 3. Juni 2012
  4. bundestag.de
Information icon.svg Dä Artikel basiert uff ere fräie Übersetzig vu dere Version vum Artikel „Katja_Kipping“ vu de dütsche Wikipedia.

E Liste vu de Autore un Versione isch do z finde.

The article is a derivative under the Creative Commons Attribution-ShareAlike License. A link to the original article can be found here and attribution parties here. By using this site, you agree to the Terms of Use. Gpedia Ⓡ is a registered trademark of the Cyberajah Pty Ltd.