Petrus (Oratorium)

Hops zue: Navigation, Suech
Dialäkt: Schwäbisch

Petrus ischt a deitsch Oratorium fir drei Vokalsolischda, an gmischda Chor, an Kendrchor ond a klois Orkeschtr vo dr schwäbischa Kombonischdin Manuela Nägele. S Libreddo basiert uff Tekscht vo dr Bibel[1]. Uruffgfihrt worra isch des Werk am 16. Okdobr 2016 en dr Kreizkirch em Stuegerter Stadtdoil Hedlfenga ondrem Dirigat vo dr Kombonischdin. Es isch zom erschda Mol en dr Gschicht vo dr Kirchamusik, dass dui Titlfigur, dr Simon Petrus, em Middlpunkt vo-ma Oratorium stoht. A Uffihrong dauret rond zwoi Stond.

Firs Orkeschtr braucht-ma

A Streichergrubbe mit zwoi Geiga, a Bratsch, a Tschello ond-ra Bassgeig, a Fleet, a Oboe, a Klarinedd[2], a Horn, a Trombeet, a Posaun, a Klavier ond a grauß Schlagwerk, ondr anrem mit Marimba, Glockaspiil ond ara graußa Trommel.

Musik

D Manuela Nägele vorwendet en ihrer Pardidur bewusst verschiidene Stilelement: Klassik, Klezmer, Pop ond Jazz mit dichde Wechsel em Rhythmus ond em Tembo. Neaba de Zitat aus dr Bibel kommet a baar bekannde Luther-Choräl mit tradizionelle Melodia vor, zom Beispiil Nun komm, der Heiden Heiland, Vom Himmel hoch, da komm ich her ond Christ ist erstanden. Dia drei Vokalsolischda – fir d Titlroll ond fir da Evangelischda braucht mr jeweils an Bass ond fir da Jesus an Tenor – soddet mit professionelle Sänger bsetzt werra, d Cheer send so gschdaldet, dass-se vo Laia guat bewäldigt werda kennet.

Handlong

Des Oratorium isch gewissermaßa a musikalischa Biografii vom Simon Petrus, soweit en dr Bibl ibr dean Moo berichdet wuud. S schildret sei Beruafong, zeigt uff, was der Moo mit Jesus Christus erleabt ond wia-nr sein Herr ond Moischder vorleignet. Uffheera duat dui Gschicht en dr Zeit noch dr Auferstehong vom Jesus.

Litradur ond Quella

Weblink

Fuaßnoda

  1. Genau gsait: uff dr BasisBible. Do drbei handlet’s sich om a moderna Bibelibrsetzong, wo vo dr Deitscha Biblgsellschaft vorantwordet wuud. Des hot da Vordeil, dass en deam Werk lange Schachdelsätz ond schwer vorstendliche Erkläronga vormiida werdet.
  2. Anstelle vo-ra Klarinedd ko laut dr Pardidur au a Saxofon vorwendet werra.
The article is a derivative under the Creative Commons Attribution-ShareAlike License. A link to the original article can be found here and attribution parties here. By using this site, you agree to the Terms of Use. Gpedia Ⓡ is a registered trademark of the Cyberajah Pty Ltd.