Superman

Neidio i: llywio, chwilio
Logo Superman, sy'n ymddangos ar ei frest.

Uwcharwr comics DC yw Superman. Crëwyd gan yr awdur Jerry Siegel a'r arlunydd Joseph Shuster ac ymddangosodd yn gyntaf yn rhifyn cyntaf y llyfr Action Comics ym mis Mehefin 1938. Addaswyd y cymeriad ar gyfer radio, stribedi papurau newydd, rhaglenni teledu, ffilmiau, a gemau fideo. Un o gymeriadau comic enwocaf a mwyaf llwyddiannus y byd yw Superman, a helpodd i greu archdeip yr archarwr Americanaidd a rhoi iddo'r lle blaenaf yn llyfrau comics yr Unol Daleithiau.[1] Adwaenir y cymeriad hefyd gan yr enwau Man of Steel (y Dyn Dur), Man of Tomorrow (Dyn Yfory), a Last Son of Krypton (Mab Olaf Krypton).[2]

Ganwyd Superman ar y blaned Krypton, a Kal-El yw ei enw brodorol. Yn ôl hanes ei darddiad, cafodd ei ddanfon i'r Ddaear ar roced gan ei dad Jor-El, cyn i Krypton gael ei dinistrio. Glaniodd yn Kansas a chafodd ei chanfod a'i fabwysiadu gan ffermwr a'i wraig, a rodd yr enw Clark Kent iddo a'i fagu'n fachgen gweithgar a moesol. Yn ystod ei blentyndod a'i lencyndod dechreuodd ddangos ei alluoedd goruwchddynol. Pan dyfodd yn ddyn, penderfynodd i ddefnyddio'i rymoedd er budd y ddynolryw dan gochl yr hunaniaeth Superman.

Trigai Superman yn y ddinas Americanaidd ffuglennol Metropolis. Dan yr enw Clark Kent, mae'n gweithio fel newyddiadurwr ar gyfer papur newydd y Daily Planet. Gan amlaf, Lois Lane yw ei gariad a'r dyn drwg Lex Luthor yw ei elyn pennaf. Aelod o dîm archarwyr y Justice League yw Superman, a gweithia'n aml gyda Batman a Wonder Woman. Fel nifer o gymeriadau eraill ym Myd DC, darlunir nifer wahanol bortreadau o Superman.

Golwg nodweddiadol sydd gan Superman: gwisg las gydag arwyddlun coch a melyn ar ei frest, sy'n dangos y llythyren "S" tu mewn i darian, a chlogyn goch. Defnyddir y darian mewn amryw o gyfryngau i symboleiddio'r cymeriad. Gwelir Superman yn eicon diwylliannol Americanaidd.[1][3][4][5] Ymdrinia nifer o ysgolheigion â dylanwad y cymeriad, a chaiff ei astudio a'i drafod gan ddamcaniaethwyr, sylwebwyr, a beirniaid diwylliannol. Bu statws perchenogaeth y cymeriad yn bwnc dadl: ceisiodd Siegel a Shuster ddwywaith i erlyn DC Comics am ddychwelyd yr hawliau. Addaswyd y cymeriad mewn masnachfraint eang o gyfryngau, megis ffilmiau, rhaglenni teledu, a gemau fideo. Portreadir Superman gan nifer o actorion gan gynnwys Kirk Alyn, George Reeves, Christopher Reeve, Dean Cain, Tom Welling, Brandon Routh, Henry Cavill, a Tyler Hoechlin.

Cyfeiriadau

  1. 1.0 1.1 Daniels, Les (1998). Superman: The Complete History Titan Books. ISBN 1-85286-988-7. t. 11.
  2. Rhoades, Shirrel (2008). Comic Books: How the Industry Works. Peter Lang. p. 72. ISBN 0820488925. 
  3. Holt, Douglas B. (2004). How Brands Become Icons: The Principles of Cultural Branding. Boston, MA: Harvard Business School Press. p. 1. ISBN 1-57851-774-5. 
  4. Koehler, Derek J.; Harvey, Nigel., eds. (2004). Blackwell Handbook of Judgment and Decision Making. Blackwell. p. 519. ISBN 1-4051-0746-4. 
  5. Dinerstein, Joel (2003). Swinging the machine: Modernity, technology, and African American culture between the wars. University of Massachusetts Press. p. 81. ISBN 1-55849-383-2. 

Darllen pellach

  • Larry Tye. Superman: The High-Flying History of America's Most Enduring Hero (Random House,2012).
Comin Wikimedia
Mae gan Gomin Wikimedia
gyfryngau sy'n berthnasol i:
The article is a derivative under the Creative Commons Attribution-ShareAlike License. A link to the original article can be found here and attribution parties here. By using this site, you agree to the Terms of Use. Gpedia Ⓡ is a registered trademark of the Cyberajah Pty Ltd.