Thaana

Thaana eo anv an doare-skrivañ implijet evit an dhivehieg komzet er Maldivez. N'eo ket ul lizherenneg e gwirionez, met kentoc'h un abugida, da lavaret eo e vez skrivet pep kensonenn gant lizherennoù hag ar vogalennoù a vez lakaet a-is pe a-us gant sinoù ispisial evel en arabeg.

An nav lizherenn gentañ (h–v) a voe savet diwar stumm an niverennoù arabek hag an nav lizherenn da heul (m–d) a oa bet savet hervez stumm an niverennoù indezek. Ar peurrest (z–ch), a vez implijet evit skrivañ gerioù o tont eus yezhoù all ha dreist-holl evit treuzskrivañ gerioù o tont eus an arabeg a oa stummet hervez al lizherennoù heñvelson kemmet gant skrapoù estreget an y a-orin dianav.

Evel an arabeg e vez skrivet an thaana a zehoù da gleiz. Implijet e vez ar vogalennoù gant sinoù o tont eus an arabeg. Evit diskouez n'eus vogalenn ebet war-lerc'h ur gensonenn bennak eo ret implijout ur sin ispisial anvet soukoun.

Implijet e vez al lizherenn alifu e tri doare disheñvel: evit dougen ur vogalenn hep kensonenn ebet; gant ar soukoun e talvez e vefe distaget hir ar gensonenn a deu war he lerc'h; pa c'hoarvez ur soukoun e dibenn ur ger e vez distaget /eh/.

Notenn: Implijet e vez al lizherenn ޜ da treuzskrivañ ar son saoznek [Z]

• Omniglot Lec'hienn diwar-benn an doareoù-skrivañ (e saozneg)